Azərbaycan Respublikasının Prezidenti İlham Əliyevin Birləşmiş Ərəb Əmirliklərinə (BƏƏ) səfəri, iki ölkə arasındakı əlaqələrin yalnız diplomatik və protokol səviyyəsində olmadığını, əslində strateji tərəfdaşlıq çərçivəsinə yüksəldiyini bir daha göstərdi. Bu səfər, regional təhlükəsizlik, iqtisadi əməkdaşlıq və siyasi etimad sahələrində yeni mərhələnin başlanğıcı kimi qiymətləndirilə bilər.
BƏƏ artıq Azərbaycanın Yaxın Şərqdəki ən etibarlı tərəfdaşlarından birinə çevrilib. Münasibətlər təkcə iqtisadi maraqlarla deyil, enerji, investisiya, “yaşıl” texnologiyalar, humanitar sahələr və hərbi əməkdaşlıqla da zənginləşib. Bu, ölkələr arasında qarşılıqlı fayda və uzunmüddətli planlara əsaslanan əməkdaşlığın aydın göstəricisidir.
Ötən ilin sentyabrında BƏƏ Prezidentinin Bakıya və Şuşaya səfəri, Azərbaycanla BƏƏ arasındakı münasibətlərin siyasi dərinliyini ortaya qoydu. Bu səfər həm regiondakı yeni reallıqların qəbulunu, həm də Azərbaycanın suveren və müstəqil siyasətinə verilən hörməti nümayiş etdirdi. Şuşaya səfər isə BƏƏ-nin Azərbaycanın uzunmüddətli tərəfdaş kimi görülməsini və postmünaqişə dövründə bərpa-quruculuq proseslərinə dəstəyini açıq şəkildə göstərdi.
Bu gün dövlət başçımızın BƏƏ-yə səfəri, həm də praktiki əməkdaşlıq sahələrinin genişləndirilməsini hədəfləyir. Münasibətlər artıq yalnız diplomatik bəyanatlar səviyyəsində deyil, konkret layihələr, investisiya təşəbbüsləri və institusional əməkdaşlıq mexanizmləri üzərindən möhkəmləndirilir. Bu, Azərbaycan və BƏƏ arasında strateji etimadın dayanıqlı olduğunu təsdiqləyir.
Hərbi sahədə əməkdaşlıq da yeni səviyyəyə yüksəlib. Birgə hərbi təlimlər, iki ölkənin silahlı qüvvələri arasında təcrübə mübadiləsi, operativ əlaqələrin inkişafı və müdafiə potensialının artırılması istiqamətində mühüm addım kimi qiymətləndirilir. Əvvəllər bu səviyyədə hərbi əməkdaşlıq əsasən Türkiyə ilə həyata keçirilirdisə, indi BƏƏ də strateji tərəfdaşlıq dairəsinə qoşulub.
Azərbaycan–BƏƏ əməkdaşlığının geosiyasi əhəmiyyəti də diqqət çəkir. Beynəlxalq münasibətlərin sürətlə dəyişdiyi bir dövrdə Azərbaycan Cənubi Qafqaz, Yaxın Şərq və Mərkəzi Asiya arasında etibarlı körpü rolunu möhkəmləndirir. BƏƏ isə Bakını regionda sabitlik və proqnozlaşdırılan əməkdaşlıq üçün etibarlı tərəfdaş kimi qəbul edir.
Bu əməkdaşlıq radikal meyllərin qarşısının alınması, regional təhlükəsizlik və konstruktiv gündəliyin təşviqi baxımından da əhəmiyyətlidir. Azərbaycan yalnız enerji tərəfdaşı deyil, həm də sülh və inkişafın təşviqində fəal rol oynayan nüfuzlu aktor kimi görünür.
BƏƏ ilə əməkdaşlıq həm siyasi, həm iqtisadi, həm də hərbi sahələrdə dərinləşir və gələcəyə yönəlik strateji model təqdim edir. Qarşılıqlı etimad, konkret layihələr və institusional mexanizmlər, iki ölkənin sürətlə dəyişən dünya çağırışlarına birlikdə cavab verməsinə və regionda davamlı sabitliyin təmin olunmasına imkan yaradır.
Əminliklə demək olar ki, Azərbaycan–BƏƏ tərəfdaşlığı, sadəcə mövcud əməkdaşlıqdan daha geniş perspektivlər açır, regional təhlükəsizlik və iqtisadi inkişafın təşviqinə yeni dinamika gətirir və ölkələrimiz arasında dayanıqlı strateji əməkdaşlıq modelini formalaşdırır.
